IXUFRINA

Como un necesario temporal va llegar IXUFRINA ROCK, un festival que parece que ha veniu con aires nuevos, celebrau en Fonz fá unos días entorno al dia Europeo de las Llenguas. Lo que en un principio pintaba como un encuentro de rock i chen choven, va resultar muito más complleto perque va incluir atras actividaz como la del mago Miguelé, prou divertida per cierto, la risa no esta reñida con el aragonés, i la mesa redonda moderada per Jorge Pueyo i con la participación de varias mullers, entre ellas Mª José Girón, Marta Marín, Ana Mur i yo mesma. Van pasar un buen rato en el Espacio Cultural L'Urmo, charrant de la nuestra relación con la llengua materna, todas van coincidir en ser hablantes patrimonials de la mesma, 3 en la variante baixoribagorzana y 1 en la variante chesa (Marta Marín). En lo que tamé van coincidir é en que la nuestra llengua está prou estricallada i en declive, encara que los esfuerzos per conservar-la con más u menos acierto han siu grans en las zagueras décadas. La falta d'un consenso entre las propias asociacions va ser atro punto de la mesa en el que van expresar la idea de lo contraproducente d'ixa situación pa la llengua i la suya difusión. Dende distintos puntos de vista,ya seiga fent una revista en aragonés como en el caso de Marta Marín, Im fent publicidat con camisetas, bolsas i atros actos , como fá Mª José Girón, u seiga dende el terreno de la enseñanza en el que va fer incapié Ana Mur, como escribint tal como yo va dir que feba con los libros...las quatro van reconocer el mal estau actual del aragonés. Se va fer un ruego de dixar las discusions esterils i no espantar a la chen que charra u escribe como puede, perque con ixo lo que se consigue é que menos chen lo charre i escriba. Ixe temor u ixe "estres" está ben que lo tiengan con medida los especialistas, los lingüistas que estudian el aragonés a nivel científico, pero se va insistir en que sería bueno sacar-le peso i despolitizar-lo, de cara a los pocos hablantes que quedan. En ixe aspecto, se va resaltar la labor moderadora de las mullers que con la suya faena más callada, traballan per mantenir la llengua viva en las casas i en los llugars. Tamé se va fer comentario de que las asociacions actuals que traballan en defensa del aragonés están dirigidas mayoritariamente per homes, quedant las mullers relegadas a un segundo u tercer pllano. Revertir ixe feito no é fácil, pero sería prou razonable, perque la experiencia d'estes años mos demostra que las relacions entre estas organizacions tan masculinas no ha siu del tot satisfactorias. Per ixo, alabo la inciativa de Jorge Pueyo de reunir-mos en Fonz a 4 mullers, un pllacer participar en esta mesa redonda, sería bueno repetir-la de quan en quan i en atros ámbitos. A veyer si la Ixufrina se lleva ixe ambiente antiguo algo engolfau i trae aires renovaus que fan menester per esta tierra.